Gikatakdang mo asumir na sa iyang katungdanan isip Acting Mayor sa Dakbayan sa Sugbo si Acting Mayor Raymond Alvin Garcia human siya makadawat og memorandum gikan sa Department of Interior and Local Government (DILG) nga nagmando kaniya sa pag-ako sa responsibilidad isip Acting Mayor nga epektibo dayon.
Gikompirmar kini ni Acting Mayor Raymond Alvin Garcia nga nakadawat sa maong memorandum gikan ni DILG-7 Regional Director Leocadio Trovela Biyernes sa hapon nga siya maoy mopuli kang Mayor Michael Rama kinsa Kasamtangan gipaubos sa 6 ka buwan nga Preventive Suspension.
Matud ni Acting Mayor Raymond Alvin Garcia nga nakadawat siya og tawag gikan sa DILG niadtong Biyernes, Mayo 10, nga nagsulti kaniya sa pagmando, ug midugang nga siya mo-report isip Mayor karong adlawng Lunes, Mayo 13, 2024.
Gitambagan sab si Garcia sa DILG nga hulaton ang sunod nga 30 ka adlaw aron makahimo og bisan unsang kausaban.
Gibutyag ni Acting Mayor Garcia nga duna na siyay pipila ka mga tawo nga naa sa iyang hunahuna nga mouban niya sa iyang administrasyon apan magpaabot na lang sa tukmang panahon sa pagtudlo kanila.
Dugang pa nga wala siyay laing mabuhat, gawas lang sa pagsunod sa kamandoan sa DILG, hinoon si Acting Mayor Raymond Alvin Garcia padayon siyang nag-ampo alang kang Mayor Rama ug sa iyang pamilya, sa ilang hagit nga gisagubang sa pagkakarun///
