LEGAZPI CITY – Arestado sa Brgy. Mainit Sur, Perez, Quezon an Rank No. 6 Municipal Most Wanted Person kan Guinobatan, Albay.
Binisto an akusado na si alyas “Marco”, 37 anyos, mekaniko asin residente kan Brgy. Maipon, Guinobatan, Albay asin temporamenteng Perez, Quezon.
Segun sa report, nagpasiring sa lugar an miyembros kan Regional Police Headquarters Unit 5 kasarabay an iba pang unit nin pulisya nganing arestaron an akusado.
Pag-abot sa lugar, tulos isinirbi sa akusado an warrant of arrest na pirmado kan Hulyo 20, 2023 para sa kasong pagbalgar sa Republic Act No. 10883 o an New Anti-Carnapping Law of 2016.
Maabot man sa PHP300,000 an inirekomendar na piyansa para sa saiyang temporamenteng libertad.
Dinara sa Regional Police Headquarters Unit 5 an akusado para sa magkakanigong disposisyon.
