“JUST continue to fight for your right and God answered prayers.”Mao kini ang nahimong tambag ni Maria Cora Tito, acting division chief sa CEMCDO ngadto sa mga nahikawan sa katungod nga empleyado ug wala nahatag ang igong promosyon.
Matud niini nga sama sa iyang gihimo nga gipakigbisogan ang posisyon nga alang kaniya takos siya sa paghupot niini tungod kuwalipikado ug gitrabahoan usab niya.
Nasayran nga midaog sa iyang apela si Tito ngadto sa Civil Service Commission aron maangkon ang posisyon isip supervising tourism operations officer 4 sa LGU-GenSan.
Giangkon niini nga gikasakit niya og buot nga dili siya ang natuboy dihang nabakante ang maong posisyon ug taga gawas ug kulang sa qualifications mao nga iyaha kining gireklamo ug nagmadaugon.
Mag kapin tuig usab ang iyang gihimong laban aron makuha ang posisyon pinaagi sa pagtubag ngadto sa CSC nganong siya ang takos nga makakuha sa maong pwesto.
Sa karon malipayon si Tito tungod gidungog usab ang iyang pag-ampo ug gusto nga mahimong inspirasyon sa uban nga makigbisog sa ilang katungod.
