Pilason ang isa ka Person with Disabilities (PWD) nga hinablos matapos ginluthang sang kaugalingon nga tiyo sa Sitio Tarug, Barangay San Juan, Dumarao, Capiz.
Ginkilala ang biktima kay Delmar Peñola, 22-anyos, samtang ang suspek amo si Wilfredo Peñola, 41-anyos, lunsay mga residente sang nasambit nga barangay.
Sandig sa imbestigasyon sang Dumarao Municipal Police Station, naghalin ang biktima sa ila puluy-an kag padulong kuntani sa national highway sa ila lugar sang nasugata sini ang iya tiyo nga si Wilfredo kag hinali nalang nagabot sang armas kag ginluthang sang makapila ka beses si Delmar kag nag-angkon sa pilas sa magkatuhay nga parte sang lawas.
Madasig naman nga nagpalagyo ang suspek matapos ang nakumiter nga krimen.
Narekober sa lugar ang 1 live ammunition kag 3 ka basiyo nga bala sang Caliber .45 nga armas-luthang.
Ginapahayag nga away sa duta ang ginalantaw nga motibo sa natabo nga insidente. Sa karon, padayon pa ang hot pursuit operation sang mga kapulisan sa suspek. | Judy Ann Juare
