CAMARINES SUR– Sa pag arangkada ng local campaign period noong nakaraang linggo, nagpalabas agad ng paalala ang ilang mga opisyal ng Philippine National Police sa Camarines Sur na huwag magbigay ng anumang pera o campaign funds sa alinmang armadong grupo tulad ng sa mga rebeldeng New People’s Army.
Isa sa nagbigay ng paalala ay si PLt.Col Allan Macoy Jr. ng Pili Municipal Police Station nang makapanayam siya ng Brigada News FM Naga.
Nabanggit niya na may kalakihan din ang bayan ng Pili na binubuo ng 26 na barangay na kung saan ang iba sa mga ito ay malayo na sa sentro kaya posibleng mabiktima ng ganitong galawan ng mga armado ang ilang mga kandidato nila sa bayan.
Bagamat, wala pang nakakarating na anumang report sa kanilang himpilan ,higgil sa ganitong grupo ay pinag-iingat pa rin ng opisyal ang publiko.
Election time anya ngayon kaya posibleng manghingi ang mga ito ng campaign funds sa mga kandidato.
Magkagayunman, nakahanda sila sa ganitong aktibidad ng mga armado sakali mang magparamdam ngayong Halalan.
