PAKUSGAN pa sa kapulisan ang pagpahigayon og Revitalized Pulis sa Barangay (RPSB) Immersion Program partikular sa mga hilit nga lugar. Dungan kini sa padayon nga kampanya batok gitawag sa gobyerno nga Communist Terror Group (CTGs).
Kini ang gibutyag ni PGen. Guillermo Eleazar, Chief sa Philippine National Police (PNP) sa pagbisita niini sa Police Regional Office (PRO) 12 sa Barangay Tambler, GenSan Martes sa buntag. Matud ni Eleazar, dako og matabang ang programa aron makamugna og maayong relasyon ang katawhan sa komunidad ug pulis.
Usa sa tumong niini ang aron mapapha ang dili maayong tan-aw sa publiko sa uniformed men. Pamatuod ang pagbalik sa sabakan sa gobyerno sa 25 ka gituohang kanhi sakop sa New People’s Army (NPA).
Ang mga nasangpit ang nanumpa atubangan ni Eleazar nga makigtinabangay sa gobyerno aron maundang ang pipila na ka dekadang pakigbisog sa NPA batok sa gobyerno. Gihingusgan niini nga ang pagsurender sa mga nasangpit ang miagi og proseso lakip ang mga bitbit nga pusil.
Sa Sarangani Province, mipailawom sa tulo ka bulan nga ‘immersion’ ang pipila ka pulis sa Alabel Municipal Police Station sa Sitio Kablan, Domolok nga nahuman nakalabay nga bulan. ( Richel Gubalani)
