Giatiman karon sa Villa Funeral Homes sa GTH , Toril, Davao City ang 19 anyos nga miembro sa LGBT community nga nakaplagan sa sapa sa Mulig, Toril kagabii human gidunggab patay sa iyang uyab .
Ang biktima nailang si Joruel Cantuy, Luay, 19 anyos, Engineering student sa UM , lumulopyo sa New Creation, Villa Rosa, Toril, Davao city samtang ang suspek nailang si Christopher Joseph Pequiro, 20 anyos, estudysante sa usa ka kolehiyo sa Toril, lumulopyo sa Alambre , Toril ning syudad.
Kahinumduman, nanawagan ang iyaan sa biktima dinhi sa Brigada News FM (Agosto 23) gumikan missing ang iyang pag umangkon, apan human ang pipila ka gutlo boluntaryong nisurender ang suspek sa kapulisan ug niangkon nga siya maoy nipatay sa iyang uyab pinaagi sa pagdunggab sa lainlaing bahin sa lawas dayon gilabay sa Mulig River.
Kauban ang suspek ug mga otoridad, gisubay ang nahimutangan sa biktima kagabii (Agosto 23) ug nakaplapgan ang patayng lawas human gitudlo sa suspek .
Sa interview sa Brigada News Team sa kabanay sa biktima, nasayran nga human kini gipatay gi prenda pa sa suspek ang cellphone niini sa kantidad nga 7,500 pesos ug gilabay ang pawnpaper sa paglaum nga dili kini masakpan.
Ayha gipatay si Luay, una nang nagbangi ang duruha gumikan gipangwartahan na kini sa suspek human naadik sa online sabong.
Ang patayng lawas sa biktima duha ka adlaw magpabilin sa Villa Funeraria ayha i-cremate ug ihaya sa ilang balay sa New Creation, Villa Rosa, Toril samtang ang suspek gikustodia sa Toril PNP.
Giingong campus crush sa eskwelahan ang suspek. BNFM-Davao
