Ginreklamo sang duha ka indibidwal ang isa ka pulis nga katapo sang Roxas City Police Station matapos sila ang ginhanaan nga sumbagon kag gintayaan sang armas-luthang samtang yara sa atubang sang isa ka tyange sa Brgy. Bato, Roxas City sang tinalikdan nga Hulyo 10.
Ginkilala ang mga biktima nga sanday alyas “Boy”, 44-anyos, tricycle driver, kag alyas “Nonoy”, 35-anyos, isa ka collector.
Sandig sa panaysayon sang mga biktima, nagbakal sang dulce sa tyange si alyas “Boy” sang hinali nalang ini ginpalapitan sang wala na ginhingadlan nga pulis kag ginhanaan nga sumbagon kag gintutukan sang armas sa dughan. Ginapahayag nga ginpitik sini ang gatilyo sang armas apang wala naglupok. Sunod naman nga ginpalapitan sang pulis si alyas “Nonoy” nga nagapungko sa tricycle ni alyas boy kag gintayaan sang armas apang maswerte naman nga wala naglupok.
Bangud sa kahadlok, madasig nga naglakat sa lugar ang mga biktima kag ginpakamaayo nga ipabalhag ang natabo sa Roxas City PNP.
Sa karon, gina-imbestigaran na sang mga pulis ang amo nga insidente. | Judy Ann Juare
