LEGAZPI CITY – Nagkondosir nin pagtiripon an mga miyembro kan Provincial Joint Security Control Center (PJSCC) nganing pag-orolayan an saindang isasagibong lakdang sa maabot na Barangay asin Sangguniang Kabataan Elections (BSKE) 2023.
Ini nganing makipag-koordinar asin ilinyada an mga gigibuhon kan PJSCC orog na an deployment plan kan nagkapirang mga nangengenot na mga ahensya siring kan DEPED, DENR, DPWH, COMELEC, Provincial Treasury Office, Provincial asin Municipal Police Stations, DILG, ALECO, PENRO asin iba pang mga departamento.
Nagtao man nin update si COMELEC Albay Provincial Election Supervisor Atty. Ma. Aurea Bo-Bunao, manungod sa mga election partners partikularmente sa kaligtasan asin seguridad kan BSKE 2023.
An kada miyembro kan PJSCC naghayag man kan saindang pangako sa pagsyerto kan sarong matoninong asin ligtas na eleksyon ngunyan na taon.
