CAMARINES NORTE- Problema ngayon sa lalawigan ng Camarines Norte simula noong Enero ang mahabang pila sa opisina ng Bureau of Internal Revenue (BIR) na nagsisimula ng madaling araw.
Kabilang nga sa mga pumipila sa BIR ay ang mga job order employees ng Local Government Units para sa annual registration fee na kailangan nilang bayaran.
Ang bagay na ito ay nais masolusyunan ng mga Alkalde para maibsan ang problema ng kanilang job order employees.
Napagkasunduan sa isinagawang pagpupulong ng League of Municipalities (LMP) Camarines Norte Chapter na makipag usap sa BIR ukol dito.
Ayon kay San Lorenzo Ruiz Mayor Nelson Delos Santos, Pangulo ng LMP Camarines Norte mahaba umano ang pila dahil iisa lang ito para sa lahat ng transaksyon.
Aniya, sama- sama sa iisang pipila ang transaksyon ng mga may negosyo, job order at iba pa na dapat sana umano ay hiwa- hiwalay.
Bukod dito mayroon ding limit ang transaksyon kaya kahit nakapila ka ay walang kasiguruhan na ma- aacomodate.
Mungkahi ng mga Alkalde na magkaroon na lang ng schedule sa bawat bayan kung maaari.
Inatasan ng LMP si Mayor Dondon Mancenido ng Talisay na makipag usap sa Revenue District Office Number 64 para masolusyunan ang problema sa mahabang pila.
Mababatid na required ang Job Order employees na magbayad ng annual registration alinsunod sa umiiral na Revenue Memorandum Circular.
Una nang inihayag ng BIR na maliban dito ay wala na umanong nire- require na iba pang bayarin ang ahensiya.
Exempted raw kasi ang mga job order employee sa income at percentage tax dahil ang sweldo ng karamihan sa mga ito ay mababa pa sa P250, 000 kada taon.
