Gipailawom na State of Calamity ang tibuok probinsya sa Davao Oriental nunot sa rekomendasyon sa Provincial Disaster Risk Reduction and Manangement Council human sa epekto sa Shearline, nga nagdala sa kusog nga pag-ulan ug pagbaha sa probinsya.
Ang maong deklarasyon maghatag ug gahum sa provincial local government unit sa paspas nga pag-access sa emergency funds ug resources lakip na ang Quick Response Fund (QRF) aron madugangan ang lokal nga pondo alang sa mga paningkamot sa emergency response, recovery, ug rehabilitation.
Kahinumduman nga nauna nang nagdeklara og State of Calamity ang munisipyo sa Caraga, Tarragona, Cateel, Governor Generoso, ug Lupon.
Sa datos human sa gipahigayon nga Rapid Disaster Assessment and Needs Assessment (RDANA), ang pagdaot sa panahon nga dala sa Shear line nakaapekto sa gibana banaang 64,330 ka nga pamilya nga miresulta usab sa duha ka kamatayon ug upat ka pagka angol.
Samtang ang damages sa pang-agrikultura, kahayupan, ug panginabuhian mokabat sa P113.1 milyon,diin dako usab ang damages sa road networks ug critical infrastructures nga nakababag sa emergency response ug nakabalda sa hinungdanon nga serbisyo sa mga komunidad.
Tungod usab niini nga deklarasyon, usa ka price freeze ang masinatian sulod sa tibuok probinsya aron masiguro nga ang mga presyo sa mga batakang panginahanglanon dili motaas ug walay bisan kinsa nga makapahimulos luyo sa malisud nga sitwasyon.
