Ginapabugae it Police Regional Office 6 (PRO-6) ro andang madinalag-on nga kampanya kuntra sa maeain-eain nga klase it kriminalidad sa bieog nga Western Visayas.
Base sa datos it opisina, nadakpan it mga otoridad ro P160 milyon nga balor it shabu ag marijuana sa maeain-eain nga anti-drug operations halin Enero hasta Hulyo makarang dag-on.
Sa sueod man it pito ka buean, 3,444 ka mga wanted persons ro nadakop; sa mga nadakop nga pugante, 558 dikara hay nakaeakip sa “top 10 most wanted” sa andang mga lugar.
Sa kampanya man kuntra sa loose firearms, 2,309 ka mga armas ro narekober; 306 ro nakumpiska ag 2,003 ro ginsurrender.
Pagsapinal ni Police Lieutenant Colonel Arnel Solis, spokesperson it PRO6, ginasikap it mga kapulisan nga maging mahilway ro bieog nga Region 6./JIL B. LACSON
