Liwat nga ginserbihan sang dugang nga warrant of arrest ang isa ka priso nga nakahunong sa Bureau of Jail Management and Penology (BJMP) sa Barangay San Jose, Roxas City.
Ginkilala ang akusado kay Christian Jude Zaldivar Rosali alyas Tan-tan, 26-anyos, residente sang Brgy. Tiza, sining syudad.
Ang warrant of arrest sa kaso nga paglapas sa RA 10883 ukon The New Anti-Carnapping Act of 2016 ang gin-isyu kag ginpermahan ni Judge Lorencito B. Diaz, Regional Trial Court, 6th Judicial Region, Branch 17, Roxas City nga may petsa Mayo 30, 2023.
Ginrekomendar sang korte ang P200,000 nga piyansa para sa temporaryo nga kahilwayan sang akusado.
Nauna na nga napriso si Rosali bangud sa kaso sini nga paglapas sa Republic Act 10591 ukon Comprehensive Firearms and Ammunition Regulation Acts kag kun matandaan, sang damlag lang ginserbihan man ini sang warrant of arrest sa kaso nga Qualified theft.
Sa karon, nagapabilin sa kustodiya sang BJMP San Jose ang akusado para sa nagakaigo nga disposisyon. | Judy Ann Juare
