CAMARINES NORTE- Nagpaliwanag ang pamunuan ng Primewater kung bakit kinailangan na magkaroon ng tariff increase na sinimulang ipatupad ngayong buwan.
Sa isinagawang Press Conference nitong Biyernes, Hunyo 3, ipinaliwanag ni Branch Manager Mark Anthony Muroda ang mga contributory factor kung bakit nagkaroon ng dalawampung porsientong pagtaas sa taripa sa tubig na inalmahan naman ng mga kunsumidores.
Ani Muroda ang mga component ng tariff increase ay water treatment, repair and maintenance, extension and improvement, debt service , admin and personnel and other operating costs.
Binigyang diin ni Muroda na ito ang mga bagay na tiningnan ng National Water Resources Board (NWRB) kung bakit akma ang 20 percent tariff increase.
Ibinida rin ng Primewater ang iba pang mga proyekto na nakalatag at ang mga natapos na.
Kabilang sa 2022- 2023 ongoing at proposed projects ay ang Well Water Source Development sa Barangay Alawihao, Repair of M Pimentel Spring Transmission Line sa Labo, Pipe Extension Line sa Dalas, Labo, Permanent Relocation of Pipe Crossing Daet Bridge No 1, Pipe Laying Extension/Interloping Line sa Dacolang Bolo San Lorenzo Ruiz patungo sa Barangay Laniton, Basud, Surface Water Treatment Plant sa Labo, Additional 3MLD Water Treatment Plant sa Dagotdotan San Lorenzo Ruiz, Construction of 15MLD Pre- Treatment Water Filtration System sa Dagotdotan San Lorenzo Ruiz at Pipe Replacement sa J Lucban Road sa Daet.
Nang matanong kung bakit 20 porsiento ang naging pagtaas sa taripa kung pwede namang mas mababa dito, sinabi ni Muroda na ito ang “justifiable” amount na napagkasunduan sa deliberasyon base na rin daw sa mga iprinesentang component projects.
Dumistansiya naman si Muroda sa isyu ng public hearing dahil nasa NWRB na umano ito at labas na dito ang Primewater.
