NITAAS karon ang presyo sa isda sa mga merkado sa GenSan gumikan sa epekto sa bagyong Odette nga naigo sa nasud Pilipinas samtang wala pa gitugotan sa Coastguard nga makapalawod ang mga mananagat hangtud niining panahuna.
Desyembre 22, 2021 sa kaadlawon sa New Bohol Calumpang Sattelite Market nakuha sa Brigada ang presyo sa isda nga nitaas sumala sa usa ka tindera nga si Cheche sa Jodel Fish Retailer ang tulingan kun sambagon mapalit sa P180 pesos matag kilo, bariles- P280 pesos, carao kun yellowfin tuna- P250 pesos, ang borot- P220 pesos, bodboron- P230 pesos, sari-P350 pesos matag kilo.
Sumala pa nihit ang isda gumikan sa niagi nga bagyo sa nasud Pilipinas, nag-uli daw ang mga mananagat ug hulaton nga molinaw ang panahon.
Samtang sa bahin sa usa ka fishing magnate sa Gensan nga si Marfinio Tan gikumperma niini sa Brigada nga tinuod ang impormasyon nga nihit ang isda kay ang naga-abot sa mga palengke gikan sa fishport nagikan sa duol nga kadagatan ug dili sa kalawran gumikan sa niagi nga bagyo.
Gikumperma usab ni Tan nga ilang gipatago ang ilang mga mananagat sa area sa Mati aron dili mabiktima sa bagyong Odette samtang wala pa sila gihatagan og pagtugot sa taga Coastguard nga magpalawod gumikan anaa ang hulga sa maut nga panahon.
Gidugang ni Tan nga gumikan sa bag-ong mga teknolohiya ilaha na usab makita ang nagahulma nga maut nga panahon og duha hangtud tulo ka adlaw bago mohapak ang bagyo nakatago na ang ilang mga mananagat.
Tungod niini minihit ang supply sa isda mao nga adunay pag-usbaw sa presyo sa mga merkado samtang ang mga canning sa langyaw na nga supply ang ginakumpra kay gagmay ang mga isda nga makuha sa duol nga panagat. I Ver Diazon
