LEGAZPI CITY – Pigkumpirmar kan National Police Commission (NAPOLCOM) Bicol na an Police Regional Office (PRO5) an may pinakadakol na nairehistrong kasong administratibo.
Sa intrevista kan Brigada News FM Legazpi kay NAPOLCOM Bicol Regional Spokesperson Atty. Flora Mangampo Remolacio, pigsabi niya na suminunod digdi an Masbate Police Provincial Office asin Albay Police Provincial Office.
Sa datos kan opisina, sa pagtapos kan taon 2022, igwa nin 201 na pending na mga kasong administratibo kontra sa mga PNP personnels kan manlain-lain na opisina sa rehiyon.
Alagad, an numerong ini nadugangan pa ki 172 na mga kaso kan Marso ngunyan na taon.
Dugang pa ni Remolacio, sa kabilugang numero kaini na 373 mga kaso, 142 digdi an naresolberan na.
Apwera kaini, kan Hunyo ngunyan na taon, luminangkaw pa sa 390 an mga kaso, asin hale sa 142 na mga enot na naresolber, mas alangkaw man digdi an na-resolve sa kaparehas na bulan.
Mientrastanto, nagkapira sa mga kasong adminsitratibo na pigsasangat sa mga personahe kan pulisya iyo an misconduct, irregularity in performance of duty, non-performance, misconduct of becoming a police officer, asin dishonesty.
Igwa pa su boot ining manlain-laing klasipikasyon siring kan light, less grave, less serious, o grave.
Alagad segun sa komisyon, an mga pigkakasuhan sana iyo an may mga grave na kategorya nin kaso.
