NA-CONTAINED na sa otoridad ang kaso sa African Swine Fever (ASF) sa pipila ka bahin sa rehiyon-12. Gawas na lang sa bag-ohay nga kaso sa ASF nga gikaengong natala karon sa Banga, South Cotabato. Matud ni Dr. Jennifer Bulawan, laboratory chief ug focal person sa Department of Agriculture (DA) 12 base sa rekord nila naa sa 22 barangay sa Mlang, North Cotabato ang nakasudlan og ASF.
Samtang naa sa siyam barangay sa Kabacan sa maong probinsiya ang nakarekord og kaso sa virus apan kini ang na-contained na. Giangkon ni Bulawan dunay pipila ka barangay sa Matalam ug President Roxas sa maong probinsiya ang subling nakarekord og ASF case.
Nanawagan ang opisyal sa mga backyard hog raiser nga hugot ipatuman ang biosecurity sa ilang dapit sama sa dili pagpakaon og lamaw sa binuhing baboy. Sa GenSan atong Enero naa sa 508 buhing baboy ang gi-cull aron mapugngan ang pagkatap sa virus ug protektahan ang hog industry. I Richel Gubalani