Bukod sa pag inspeksyon ag pag audit, sigidas ro monitoring nga ginapatigayun it Internal Affairs Service o PIAS-Aklan sa mga pulis nga naka-deploy para magtao it seguridad sa publiko nga nagaagto sa banwa it Kalibo para sa Ati-Atihan Festival 2024.
Raya ro ginhayag ni PEMS Edgar Magbanua OIC it Internal Affairs Service o PIAS-Aklan sa interview it BRIGADA NEWS FM KALIBO.
Suno kay PEMS Magbanua, kung may nakikitang pulis hay nababatyagan it tawo nga salbar sanda ag malikawan ro anumang kinagamo.
Ginatan-aw man segun it PIAS kung maayos ro suksok it mga pulis bangud ro uniform ku mga raya hay naga representar it andang otoridad ag sambilog raya sa naga abang sa kriminalidad.
Dapat segun kay Magbanua nga snappy ag bukon it lousy ro sangka pulis para mabuoe man kara ro respeto it publiko ag mahadlok ro iba nga maghimo it owa it sayud.
Samtang sa makarun hay may nailista ro PIAS nga daywa ka walk-in complaint ag nagapadayun pa ro administrative investigation kaangot kara ngani indi pa pwedeng pangaeanan.
May una man segun sanda nga IAS desk nga pwedeng agtunan it publiko kung may reklamo ro mga raya sa pulis ag kung may manami nga nahimuan ro sangka pulis sa andang lugar. // ANN DESLENE SALAZAR
