LEGAZPI CITY – May abiso an Gobyerno Probinsyal kan Albay (PGA) sa publiko manungod sa posibleng banta nin baha asin landslide katakod kan sunod-sunod asin padagos na namamateang makukusog na pag-uuran sa probinsya kan Albay.
An nasambit na pagirumdom segun mismo kay Albay Public Safety and Emergency Management Office (APSEMO) Head Dr. Cedric D. Daep, kun sain maigot kaining pigpagirumduman an mga Albayano katakod kan heavy rainfall advisories na ipigpaluwas kan PAGASA sa saindang pinakaultimong weather bulletin kasuhapon.
Segun sa opisyal, dai man subuot pighahali kan saindang opisina an posibilidad nin pagbaha asin pagrasay nin daga lalo ngonian na mauran na panahon. Sinabi pa ni Daep na dapat subuot na ibitaran muna kan mga lokal na mga parasira na igwa nin saradsyot na lunadang pandagat an pagpapalaot dahil sa nasambit na maraot na panahon. Dapat man subuot na ibitaran na magpasiriring sa mga gilid nin salog asin sa mga kadagatan lalong-lalo na sa west coast.
Katakod kaini nagpaluwas naman nin advisory an Provincial Disaster Risk Reduction and Management Office (PDRRMO) sa bisa kan PDDRMC-APSEMO Advisory 9-2024.
