Maga himo it Career Expo ag Job Fair para sa mga gustong mag apply it trabaho pinaagi sa Public Employment Service Office (PESO)-Aklan humalin it September 15- 16 sa Agusto B. Legaspi ABL Sports and Cultural Center Provincial Capitol Ground.
Sa interview it BRIGADA News FM Kalibo kay Ms. Sharon Mae Julian, Focal Person for Local Employment it PESO-Aklan, raya hay unang job fair matapos ru pandemic.
Kapartner sa nasambit nga kahiwatan ru Aklan Provincial Government sa pag pamuno ni Governor Joen Miraflores, DOLE-Aklan, Aklan Tourism and Trade Investment Promotion Center.
Naga usoy pa ru PESO-Aklan it may kapin sa 18 pa ka mga confirmed local establishments nga maka tao it gina bana-bana nga 1,000 ka mga trabaho.
Dugang pa ni Julian, ru mga kompermadong local establishments hay halin sa industriya it Business Processing Outsourcing (BPO) companies, Accounting Firm, distributors, manufacturing, hotel and restaurant ag iba pa.
Sa makaron, padayon pa ru pag-aeabutan it kompermasyon halin sa mga kompanya nga naga usoy it mga aplikante.
Naga offer man it kahigayunan ru pilang ka mga agencies sa overseas employment, construction workers, seafarers at iba pang kinahangeanon.//MARIVIC Y. ILIN
