DAKPAN ang usa 71-anyos nga lalaki sa Alabel, Sarangani Province tungod sa gikaengong pag-praktis og dentistry nga walay lisensiya.
Gidakop sa mga personahe sa Criminal Investigation and Detection Group (CIDG), gahapon sa hapon ang usa ka Pablito Langaylangay, 71-anyos, taga purok 5, Barangay Ladol, Alabel, Sarangani Province.
Butyag ni Police Lt.Col Ernor Melgarejo, labaw sa CIDG sa Sarangani, miaksyon sila dungan sa reklamong nadawat sa gikaengong praktis sa maong indibidwal. Didto na nila gihimo ang entrapment operation batok sa dinakpan sa panimalay nini sa purok 5, Barangay Ladol.
Dugang ni Melgarejo, naaktohan nila nga nagpraktis og dentistry sama sa pagpangibot og ngipon ang dinakpan nga walay lisensiya. Sa bahin usab ni Langaylangay, pila na niya ka dekadang gihimo ang pagpangibot og ngipon ug kini ang agi niya og tabang ug halos wala nakapabayad.
Nakumpiska gikan sa dinakpan ang nagkadaiyang dentistry tools ug materials. Ang dinakpan ang pasakaan og kasong pagsupak sa provisions sa Republic Act 9484 o Philippine Dental Act. I Richel Gubalani
