Nagapangatubang sang patong-patong nga kaso bangud sa pagpangawat ang 52-anyos nga mister matapos ginserbihan sang warrant of arrest sa Barangay Poblacion Norte, Ivisan, Capiz.
Ginkilala ang akusado kay Jimmy Barrios, kasado, kag residente sang San Felipe Neri Subd. Barangay Sta. Cruz, Ivisan, Capiz.
Ang mandamiento de aresto sa anum ka count sang qualified theft ang gin-isyu ni Hon. Kristine B. Tiangco-Vinculado, Presiding Judge, RTC Branch 16, Roxas City, Capiz, napetsahan Hunyo 5, 2023 kag may ginrekomendar nga piyansa nga P10,000 sa kada kaso nga ginpasaka sa iya.
Samtang, ginserbihan pa gid si Barrios sang isa pa ka warrant of arrest nga ginpapanaog naman ni Hon. Ramces Jhon H. Honrado, Presiding Judge, sang MCTC Dao-Ivisan, Dao, Capiz sa kaangay man nga kaso nga pagpangawat kag may piyansa nga nagdangat sa P6,000.
Sa karon nakahunong ini sa karsel sang Ivisan Municipal Police Station para sa nagakaigo nga disposisyon. | KMD Gicalde
