Patay ang 50-anyos nga pedestrian matapos nabungguan sang motorsiklo sa Brgy. Lonoy, Roxas City, Capiz.
Ginkilala ang napatay kay Edgar Catimbang, isa ka casual government employee kag residente sang Brgy. Ondoy, Ivisan.
Samtang pilason naman ang driver sang motorsiklo nga ginkilala kay Reynan Buday, 35-anyos kag ang back rider sini nga si Selvino Geronimo, 24-anyos lunsay mga residente sang Brgy. Mianay, sa banwa sang Sigma.
Sandig sa imbestigasyon sang Roxas City PNP, ginapahayag nga nagikan sa Brgy. Mianay sa banwa sang Sigma sanday Buday kag Geronimo sakay sa Suzuki Raider 150 nga motorsiklo kag padulong kuntani sa Brgy. Lanot.
Apang, pag-abot sa Brgy. Lonoy, aksidente sini nga nabungguan si Catimbang nga nagatabok sa karsada.
Bangud sa impact sang pagkabunggo, nag-angkon sang patal nga pilas sa ulo ang biktima nga madasig naman ginpadangat sang Capiz Emergency Response Team (CERT) sa Capiz Doctors Hospital, apang ini ang ginbawian sang kabuhi samtang ginabulong.
Nag-angkon naman sang kapilasan sa nagkalain-lain nga parte sang kalawasan sanday Buday kag Geronimo nga ginpadangat naman sa Roxas Memorial Provincial Hospital para sa nagakaigo nga pagbulong.
Sa karon, naka-hospital arrest si Buday samtang ang motorsiklo nga naulamid sa aksidente ang ginkustodiya sa Roxas City PNP para sa nagakaigo nga disposisyon.
