KABANKALAN CITY, Negros Occidental — Nanindugan ang “Paghida-et sa Kauswagan” Development Group Inc. (PDG, Inc.) nga ang ila adbokasiya sa pagbulig sa mga komunidad sa Negros agud mapa-nami ang ila kalidad sang pagpangabuhi, indi terorismo.
Nagsugod ang PDG sadtong 1987 bilang isa ka non-profit organization, apang na rehistro lamang sa Securities and Exchange Commission (SEC) sang Mayo 30, 1988.
Ang dako nga kapyerdihan sa industriya sang kalamay sa probinsya sang 1980’s, kag ang naga panguy-ab nga ‘gap’ sa tunga sang mga manggaranon kag pigado ang nagatulod sa grupo nga mag dihon sang mga programa para sa mga kumunidad agud mahatagan bulig, ilabi na ang mga mananagat, sugar workers, landless rural workers, kag iban pa.
Apisar sa maayo nga na-bulig nga inisyatibo sang PDG lakip na ang pagsulong sang kinamatarong sang mga pumuluyo sa kaumhan, gina-alegar nangin target man sila sang intimidasyon kag “red-tagging” gikan sa mga katapo sang kapulisan kag militar nga gina-suspetsuhan naga-suporta sa New People’s Army.
Madumduman nga duwa sa ila miyembro kag duwa pa gid ka anay grupo sang PDG, ang naga-pangatubang sa karun sang complaint sa Department of Justice, sa alegasyon nga ang mga ini naga biolar sa Republic Act 10168, ukon Terrorism Financing Prevention and Suppression Act of 2012. Sa malip-ot nga pulong, alegasyon nga nagaduot sa ila nga naga hatag bulig pinansyal sa NPA.*