LEGAZPI CITY – Pigkumpirmar ni Albay Governor Edcel “Grex” Lagman na nagsimbag na si Presidente Ferdinand “Bongbong” Marcos sa surat asin kahagadan kaini katakod sa pang-inguwa nindang makua an hustiya sa pagkagadan ni Kap. Alex Repato kan San Jose, Libon kan Agosto 28, magin sa iba pang mga opisyales na naenot na ginaradan.
Segun sa gobernador, nagbilog na an presidente nin Special Investigation Task Force (SITD) na pinapangenotan ni Col. Jess Rebua.
Ini nganing magkaigwa na nin mas komprehensibo asin mas mahigot na imbestigasyon para sa nasambitang mga opisyal.
Sinabi pa ni Lagman sa saiyang social media post, gigibuhon niya an gabos asin dai siya matunog hasta sa dai nakukua an hustiya para sa mga ini.
Mienrastanto, pigkumpirmar man kan gobernador na tatawan niya nin asistensya an nagkawaralat na pamilya ni Repato sa paagi kan Provincial Social Welfare and Development Office (PSWDO) asin kan Albay Matibay Foundation, Inc.
