Dismayado ang pamilya sang tatlo ka mga estudyante nga napatay matapos salakayon sang salakyan ang ila motorsiklo nga ginasakyan sa Arnaldo Boulevard, Brgy. Baybay, Roxas City sadtong Disyembre 10, 2023 bangud wala nagahulag ang kaso nga ila ginpasaka sa driver sang salakyan nga si Jerex Diawara.
Matandaan, ginkilala ang mga napatay nga sanday Joshua Doronio, 18-anyos, residente sang Brgy. East Villa Flores sa banwa sang Maayon; Justine Villariña, 16-anyos, residente sang Brgy. Chiquito, Panay kag Cedric Baes, 16-anyos, (backrider ni Villariña) residente sang Brgy. Pob. Tabuc, Panay.
Sa interview sang Brigada News FM Roxas kay SB Wildie Delfin Doronio – Tiyo ni Joshua Doronio, iya ginpahayag nga wala nagahulag ang kaso nga ginpasaka batok kay Diawara bangud suno sa isa ka staff sang hall of justice, kulang sang nagakaigo nga ebidensya kasubong sang kuha sang CCTV sa lugar kun sa diin natabo ang aksidente nga dapat i-presentar sa korte.
Suno kay Doronio, kasubong nga ginapabaya-bayaan sang mga otoridad ang pagproseso sang duha ka kaso nga Multiple Homicide kag Physical Injuries and Damage to Properties batok kay Diawara.
Ginpahayag man sini nga sang Enero 18, 2024, ginpaiway ang natalana kuntani nga hearing sa kaso bangud wala sang ebidensya nga ginpresentar ang imbestigador sang Roxas City PNP tungod ginapahayag nga indi basta-basta makuha ang kopya sang cctv sa central bank nga ini naman ang wala niya ginapatihan.
Dapat man suno diri nga magkuha nalang private attorney ang mga biktima ni Diawara agud matutukan ang kaso.
Nagapangabay man ini sa kapulisan kag mga opisyales sang gobyerno nga kuntani mabuligan man ang pamilya agud mahatagan sang hustisya ang kamatayon sang mga biktima. | Judy Ann Juare
