Patay ang inahan samtang tugpa sa ospital ang uban pa nga miyembro sa pamilya sa dihang nakasugamak og disgrasya sa Brgy. Marber, Bansalan, Davao del Sur kaganinang buntag.
Sa report sa Bansalan Municipal Police Station giila ang mga biktima nga silang Wilfredo Tonido Loquenario Jr. nga maoy nagmaneho sa motor angkas silang Ginalyn Senas Loquenario nga namatay sa hitabo samtang samaran usab ang duha ka anak nga silang Nina Faith, 9-anyos ug Fiona, 6-anyos.
Sa imbestigasyon nasayran nga padulong sa Cotabato area ang pamilya sakay sa motorsiklo sa dihang mibangga sa likod ang SUV nga gimaneho ni Edward Harvey Perez nga taga Pantukan, Davao de Oro.
Atol sa pagbangga didto nagpadulong sa ginaayong dalan ang pamilya hinungdan sa mga samad nga naangkon nga gikamatay ni Ginalyn.
Sa pagkakaron padayon ang ginahimong imbestigasyon sa kapolisan. BNFM-Davao
