BNFM BICOL—Katatapos lang subago kan Miss Universe 2021 kung sain natukdol kan pambato nin India an korona kan nasabing pageant. Mantang an satung pambato na si Beatrice Luigi Gomez, nagtapos sa Top 5.
Dakul an nanghinayang alagad mas dakul man giraray ang naugma sa naging performance ni Bea sa Miss U pageant.
Katakod kaini, sarong Bicolana na tubong Virac sa probinsya nin Catanduanes ang magiging representante kan Pilipinas para sa Mrs.Universe 2021 na ikukundusir ngunyan na maabot na Pebrero taon 2022.
An satung kandidata binistong si Mrs. Marissan Araza Belangel –Conche, na saro na ngunyan sa mga opisyal na candidate sa Mrs. Universe 2021 na gaganapon sa South Korea.
Nagdakula sa islang probinsya si Marissan, asin nagtapos nin kursong Bachelor of Science in Nursing. May apat na aki asin kinseng taon nang kasal.
Apwera sa pagiging hands on mother sa saiyang mga aki, saro man sa saiyang pinagkakasibutan ang pagiging sarong propesyonal na aesthetician asin paratukdo sa ika-duwang pinakadakulang international permanent make up academy sa Europa.
Saro sa saiyang adbokasiya ang pangataman asin pataason an moralidad kan mga kababaihan na igwang helang na Alopecia o ang pagkawara asin pagkakalbo nin buhok sa lawas.
Nagtatao siya nin libreng wig asin nagkukundusir nin microblading sa mga babaeng mayong kiray para sa siring na paagi, matatabangan sindang mapalangkaw an kumpiyansa sa sadiri. Kompwesto nin mga nagkapirang titulo ang paglalabanan sa Mrs. Universe asin ang titulong Mrs. North Pacific Asia. ###
