MINGAW ang palit sa karneng baboy sa merkado publiko sukad nga gipangkuha sa taga gobyerno niadtong adlaw nga Lunes ang mga baboy sa Purok San Lorenzo Ruiz, Apopong sumala sa pangulo sa Meat Vendors Multipurpose Cooperative.
Sa kumpermasyon sa labaw sa Meat Vendors nga si Toto Mosqueda wala daw sila gipahibalo sa kinsa man nga taga gobyerno kalabot sa nahitabo sa Apopong, nakabalita nalang sila nga gipanguha ang mga hayop mao nga sila wala na usab naga adto sa lugar aron mangumpra.
Gikumperma usab ni Mosqueda nga sa wala pa nigawas ang impormasyon nga adunay nasakit nga baboy sa San Lorenzo Ruiz, Apopong nagakumpra usab ang pipila sa ilang kaubanan sa mao nga dapit, apan gumikan gibawal na nga mosulod sa lugar wala na usab sila nisulod.
Gumikan sa sitwasyon sa kahinay sa palit nga posibling na-apektuhan gumikan sa gipang-culling nga mga baboy agwantahon nalang daw nila hangtud nga manumbalik ang kakusog sa palit sa karne.
Sa bahin ni Mosqueda, gipaniguro usab niini nga hinlo ang iyang ginatinda nga karne gumikan sa piggery farm siya nagakuha ug ihawon ,samtang nasabtan usab niini ngano daw aduna gihapon nagapakaun og lamaw gumikan nagmahal ang feeds mao nga mahal usab ang farm gate Price.
Kahiblauan nga gikumperma usab sa tag-iya sa backyard piggery sa Purok San Lorenzo Ruiz, Apopong nga gitudlong maoy sinugdan sa sitwasyon karon nga nagapakaun sila og lamaw gikan sa mga malls ug sa mga kan-anan sa mga barangay kay kon feeds mahal ug modako ang ilang gastos. I Ver Diazon
