GIPUNTO ni Brigada Elmer V.Catulpos nga modaghan lang ang trabaho ug modako ang koleksyon sa buhis kung naay mas daghang investors nga mosulod sa siudad.
Apan giklaro ni Brigada Elmer nga ang mga investors nga makatabang sa pag-angat sa kinabuhi sa katawhan dili mosulod kung dili nato masabtan ang interests ug huna-huna sa mga investors kung unsay naga- motivate sa ilaha aron mo-invest sa usa ka lugar.
Alang sa Ama ng Brigada, ang dugang mga industries nga tutukan nga mao ang tourism, manufacturing ug business process outsourcing parehong magdala ug kwarta dinhi sa GenSan gikan sa ubang mga lugar, maghatag ug daghang trabaho ug makahatag ug mas dako nga buhis sa gobyerno aron magamit sa paghatag ug libreng mga serbisyo, bisan dili local customers ang ilang target.
Apan ang pangutana, unsaon sa pag-engganyo sa mga investors ni-ana nga mga industries nga dinhi sa GenSan mag-invest?
Kinahanglan nila nga makita nga sayon lang sila makanegosyo sa syudad, adunay attractive nga mga programa, polisiya ug direksyon alang sa mga investors.
Kini matud pa ni Brigada Elmer kayang buhaton depende sa lider nga suportado sa katawhan aron makab-ot ang GenSan dream ug daghan ang moangat sa kalisod.
