Hinimok ng Palasyo ang mga lokal na pamahalaan na magpasa ng ordinansa na magpaparusa sa mga indibidwal na mahuhuling nagbebenta ng COVID-19 vaccines o vaccination slots.
Ginawa ni presidential spokesperson Harry Roque ang pahayag sa gitna ng mga ulat na mayroong nagaganap na bentahan ng vaccination slots sa ilang lungsod sa National Capital Region (NCR).
Ayon kay Roque, libre lahat ng bakunang ipinapadala sa mga lokal na pamahalaan at di ito aprubado for commercial use.
Aniya ang pagbebenta ng mga bakuna ay swindling o di kaya ay paglabag sa FDA law.
Binigyang diin ni Roque na di papayagan ng Malacanang ang pagbebenta ng mga bakuna dahil malalagay sa alanganin ang commitment ng bansa sa COVAX Facility para sa pantay na pamamahagi ng bakuna.
Mababatid na nagpasa na ang Manila city government ng ordinansa na magpaparusa sa mga indibidwal na nasa likod ng nasabing kalakaran.
Batay sa mga ulat, ibinebenta ang vaccine slot sa ilang LGUs sa halagang aabot ng P15,000 kada isa.
