Arnel Callet
CAUAYAN, Negros Occidental — Plano nga pasanyugon ang mga palangabuhian sa mga komunidad sa banwa sang Cauayan nga mga anay apektado sang inaway sa tunga sang New People’s Army (NPA) kag pwersa sang gobyerno.
Sa interview sang Brigada News FM-Kabankalan kay Sybel Nobleza, external affairs manager sang Association of Negros Producers (ANP), iya ginpahayag nga naga-dihon na sila sang mga sustainable nga mga plano para mapasanyog ang palangabuhian sang mga residente sa kabukiran sang Cauayan.
Sa idalum sang programa nga “Balik Salig” sang Negros Occidental Provincial Peace and Order Council, gintugyanan ang ANP nga magbulig sa mga conflict-free areas. Diri, pagahatagan sang training ang mga residente sa pagproseso kag paghimo sang mga produkto nga puwede ibaligya kag makwartahan.
Suno kay Nobleza, ang mga produkto sang mga komunidad mahimo nga mabaligya sa Negros Trade Fair (NTF) sa Metro Manila nga ginahiwat kada tuig.
“Kami sa Association of Negros Producers, willing kami mag-promote kag mag-market sang ila mga produkto,” pahayag ni Nobleza.
Gindugang pa niya, “May yara sang kalinong (peace) kun pabaskugon ang economic development sang isa ka lugar.”
Ginalauman ni Nobleza nga maka-intra ang Cauayan sa Negros Trade Fair sa 2025 kag gina-workout na sang ANP ang posible nga mga komunidad sa banwa nga buligan develop kag promote sang ila mga produkto.
Si Nobleza, isa man ka board member sang Hope Builders Organization Negros Island Incorporated (HBONI), isa ka youth organization sa isla nga may adbokasiya nga naka-angkla sa edukasyon. -BNFM Kabankalan
