Dakong sagpa ug kaulaw matud pa alang sa Communit Party of the Philippines-New People’s Army-National Democratic Front of the Philippines ang pagsurender sa tag-as nga mga lider ug mga sakop sa gobyerno.
Kini ang paghulagway ni Eastern Mindanao Command (EastMinCom) chief Lieutenant General Greg Almerol human namatikdan ang paspas nga pagbungkag sa liderato sa NPA nunot sa pagtahan sa pito ka NPA leaders sa nagkadaiyang yunit sa ubos sa EastMinCom.
Usa sa notadong opisyal sa walhong grupo mao si Pedro Arnado, chairperson sa Kilusang Magbubukid ng Pilipinas-Southern Mindanao Regional Committee (KMP-SMRC) ug national treasurer; Ruel Dum-ogan alias Regan, Commanding Officer sa HQ Force Neo, North Central Mindanao Regional Committee (NCMRC) ug asawa niining si DN Saritao, Platoon Medic sa Platoon 1 sa susama nga unit; Marvin Magrano alyas Loloy, kanhi Provincial Coordinator sa Bayan Muna Sarangani Province ug nagsilbi nga Vice Chairman sa nabungkag nga Guerrilla Front (GF) Tala Pambansa-Demokratikong Paaralan and Regional Headquarters, SMRC.
Dugang sa mga nitahan ang tag-as nga opisyal nga sila si Eping Iligan Salahay alyas John, Commanding Officer ug Milisyang Bayan sa GF21C; Romeo Bontulan nga mao ang Team leader sa Squad Abe, RHQ, SMRC; ug alyas Dala, kanhi Commanding Officer sa SYP Gabon, GF 88.
Sagad sa mag rason sa ilang pagsurender mao ang kurapsiyon sulod sa kalihokan, pagpasagad ug wala gituman nga mga saad.
Tungod niini, gihangyo ni Almerol ang mga nahibiling ulipon sa bakak ug walay pulos nag pakigbisog nga motahan samtang duna pay panahon aron maka-tagamtam sa mga benipisyo ug programa nga gitanyag sa gobyerno alang kanila. BNFM-DAVAO
