Mariing kinondena ni Cagayan De Oro Second District Representative Rufus Rodriguez ang “unilateral enforcement” ng China sa ilegal na panuntunan nito na huhulihin at ikukulong ang umano’y mga trespasser sa inaangkin nitong teritoryo sa West Philippine Sea.
Ayon kay Rodriguez, walang basehan sa batas ang Chinese Coast Guard Order Number 3 partikular ang Regulations on Administrative Law Enforcement Procedures for Coast Guard Agencies at nilalabag nito ang UNCLOS at ang 2016 Arbitral Ruling.
Kung tutuusin ay China pa aniya ang maituturing na trespasser sa Exclusive Economic Zone at sila ang dapat hulihin at ikulong.
Binanggit nito ang insidente kung saan sumakay ang Chinese Coast Guard personnel sa barko ng Pilipinas sa Ayungin Shoal.
Giit ni Rodriguez, lalong pinalalala ng China ang tensyon sa West Philippine Sea at ginugulo ang kapayapaan, stability at kasaganaan sa rehiyon.
