GIMANDU na sa labaw sa kapulisan sa Soccsksargen ang koordinasyon sa imbestigasyon sa duha ka police office sa rehiyon. Kini dungan sa pagpamusil-patay kang Police Corporal Rickey Gomez, police intelligence office sa presinto sa Cotabato province.
Sa text message nga gipadala ni Police Brig. Gen. Jimili Macaraeg, director sa Police Regional Office (PRO) 12 gibutyag niini nga gimanduan niya ang General Santos City Police Office ug Cotabato Provincial Police Office (CPPO) nga maghiusa sa imbestigasyon.
Dugang ni Macaraeg, gimanduan niya ang mga nasangpit nga gilayong ilhon ang mga mipatay kang Gomez ug pasakaan og kaso.
Una nang, gibutyag ni Police Col. Nicomedes Olaivar Jr., director sa GSCPO nga gipasidunggan si Gomez sa kapulisan tungod sa nahimo niini nga dagkong accomplishments.
Sama na lang sa pag-trace sa gitagoan sa wanted persons ug miyembro sa Dawlah Islamiya sa Bangsamoro Islamic Freedom Fighters nga lambigit sa maduguong terror attacks ug pagpangilkil.
Ang mga nahimong trabaho ni Gomez isip pulis ang gisundan nga motibo sa GSCPO sa planadong pagpatay kaniya sa GenSan. I Richel Gubalani
