DAKONG hisgutanan karon sa mga lumulupyo sa Polomolok, South Cotabato ang pagputol sa dakong kahoy sa mangga nga sumala pa pipila na kadekada nga nagbarug daplin sa National Highway nga maoy nakahatag usab og kasilungan sa pipila ka mga indibidwal panahon sa masinatiang tukmang kainit sa panahon.
Gikagubtan ug nakaangkon og daghang komento ang usa ka post sa social media kalabot sa pagputol sa kahoy sa mangga sa maong lugar. Samtang pipila usab ka mga indibidwal ang nagkanayong sayang tungod sa kadugayon na niini ug alang kanila historical ang maong punuan.
Sa bahin usab sa Municipal Environment and Natural Resources Office, gibutyag ni MENRO Officer Agustin Valencia nga ang pagputol sa kahoy ang subay sa kamanduan sa Lokal nga Panggamhanan ug may permiso gikan sa Community Environment and Natural Resources Office tungod makonsidera na matud pa ang kahoy nga hazardous o delikado alang sa mga lumalabay sa maong lugar.
Si Crispin Seran ang maoy nanag-iya ug nagtanum sa kahoy nga gibutyag nga 50 katuig nang nagbarug sa maong lugar ang nasubo apan kinahanglan musunod sa kamaduan sa gobyerno. Nagpasalamat nalamang usab si tatay Crispin sa mga nakisimpatya kanila human giputol dekada nang kahoy nga nag serbisyo kanila.
Nangayo nalang usab og pagsabot ang MENRO-Polomolok ngadto sa mga nakurat ug nasubo sa pagkaputol sa maong kahoy tungod alang gihapon kini sa development sa munisipyo. I MJ Fernandez
