LEGAZPI CITY – Padagos an pagpataw nin penalidad kan Public Safety Office Legazpi City sa mga tricycle driver na nag-oovercharge sa saindang mga pasahero sa siyudad. Katakod ini kan nairehistrong kaso nin overcharging sa syudad kun sain igwa su buot nin tricycle driver na nagsingil sa saiyang solong pasahero nin P40 dawa pinara man sana ini mantang nagpapasada.
Segun kay PSO Legazpi Chief Rolly Esguerra, pag arog kaining kaso, dapat na P12 sana an babayadon kan pasahero lalo na pinara man sana kaini an driver asin dai man ini nakaparada. Dugang pa ni Esguerra, pinatawan na an nasambit na driver nin penalidad na nagkakantidad nin P3,000 para sa saiyang bayolasyon manungod sa overcharging.
Kun magigirumduman, pigsiyerto kan Tricycle Operators and Drivers Association Legazpi Team na dai nin mapasaway na mga tricycle driver sa siyudad orog na ngunyang nagpapadagos an Private Schools Athletic Association 2024.
Pagirumdom ni TODA Legazpi Chief Lary Pineda sa mga pasahero, en kaso makaeksperiyensya nin bako tamang singil sa pamasahe sa mga tricycle driver, siyertuon na kuhaon o aramon an plate number asin tulos mag-report sa sainda nganing mapanimbag an mga ini.
