Tiniyak ng Department of Education (DepEd) na hindi maaapektuhan ng pagbabago ng pamunuan ng ahensya ang paghahanda sa pagbubukas ng mga klase sa Hulyo 29.
Ito’y kasunod ng anunsyo ng Malacañang na si Sen. Sonny Angara ang napiling pumalit kay Vice President Sara Duterte bilang Education Secretary.
Ayon kay DepEd Undersecretary Michael Poa, nagsimula na ang enrollment activities, gayundin ang iba pang paghahanda para sa pagbubukas ng school year.
Isinagawa rin ng ahensya ang isang inter-agency meeting kahapon upang magplano para sa “Brigada Eskwela,” o ang taunang programa sa pagpapanatili ng mga paaralan sa buong bansa na umaakit sa lahat ng stakeholder ng edukasyon.
Para sa maayos na transition ng pamunuan, tinatapos na rin ng DepEd ang ilang mga ulat na isusumite sa tanggapan ni Sen. Angara, gayundin din ang pagpa-plano sa pagpupulong ng Senador kasama si VP Duterte.
