MOSUNOD ang lokal nga panggamhanan sa GenSan sa mandu gikan sa nasudnong gobyerno. Ang pamahayag ni Mayor Ronnel Rivera ang dungan sa pag-apruba sa National Inter-Agency Task Force for the Management of Emerging Infectious Diseases (IATF-EID), Huwebes sa pagpaluag sa ‘age restrictions’ sa mga lugar ilawom sa General Community Quarantine (GCQ) ug MGCQ.
Matud sa mayor, gihulat lang nila ang pag-abot sa guidelines sa pagtugot na sa NIATF sa pagpagawas sa edad 5-anyos paubos. Una nang, gianunsiyo ni Spokesperson Harry Roque, gitugotan na ang mga bata nga mogawas o moadto sa mga parke, playgrounds. Lakip moadto sa mga beaches, biking and hiking trails lakip sa mga Outdoor tourist sites ug atraksyon nga gipasabot sa Department of Tourism apil ang outdoor non-contact sports courts and venues ug al-fresco dining establishments.
Giklaro ni Roque nga wala gitugotan ang mixed-use indoor o outdoor buildings ug facilities sama sa malls ug susamang establisimento. Naa sa GCQ ang quarantine classification sa GenSan apan duna kini apela sa NAITF sa pagbutang GCQ with heightened restrictions dungan sa padayong pagsaka sa kaso sa Covid-19. (Richel Gubalani)
