Ginkumpirma it Malay Municipal police station nga ro pagkamatay it daywa ka turista sa isla it Boracay hay ginakonsidera it mga otoridad nga “case closed.”
Matandaan nga ku Marso 21, 2022, nakit-an ro bangkay it daywa ka 44 anyos nga babaye ag eaeaki sa kwarto it andang hotel.
Base sa imbestigasyon it mga kapulisan, homicide-suicide ro natabo.
Namatay ro babaye bangud sa pagkuga samtang namatay ro eaeaki nga turista sa patal nga tama nga naangkon sa idaeom nga parte it eawas partikular sa waea ag tuo nga batiis kara.
Nagapati ro pulisya nga ro eaeaki nga turista ro nagpatay sa Australian national paagi sa pagkuga. Matapos raya nga patyon, nagpakamatay man ro eaeaki nga turista.
Dugang man it Malay MPS, nagapadyon nga mahilway nga tourist destination sa mga international ag lokal nga turista ro isla sa tunga it nasambitan nga insidente./JIL B. LACSON
