BICOL – LIWAT NA nagsagibo nin pag urulay an DSWD Bicol kasabay an halangkaw na opisyal gikan sa central office tanganing diskutiron an distribusyon nin ayuda sa lindong kan man iba ibang mga programa kan ahensya.
An nasabing consultation meeting an isinagibo sa pagultanan kan Disaster Response Management Division kan DSWD-Bicol kasabay si Regional Director Leo Quintilla asin ASec Rudolfo Encabo kan Disaster Response Management Bureau o DRMB-DSWD Central Office.
Nadiskutir digdi an distribusyon kan Emergency Shelter Assistance asin Cash-For-Work sa rehiyon siring man an posibleng mga lakdang tanganing mapakaray an pagkalap nin datos sa panahon nin kalamidad.
Kasunod kaini personal na pinangenotan ni Asec Encabo an distribusyon kan tabang sa irarom kan nasabing mga programa para sa mga benepisyaryo kaini sa ciudad nin Tabaco sa Albay.
Mantang nanao man nin parehong tabang pinansyal an DSWD-Bicol para sa mga benepisyaryo kaini sa banwaan kan Malinao asin islang banwaan kan Rapu-Rapu.
Lambang benepisyaryo an nakaresibe nin 13,000 pesos kung saen dyes mil an para sa ESA asin 3,100 para sa CFW).
An ESA asin CFW an parte kan disaster recovery program kan ahensya na igwang obhetong matabangan an mga pamilyang naapektaran kan kalamidad sa paagi kan pagtataong tabang para mapakaray an saindang residencia asin magkaigwa nin kabuhayan.
Photo courtesy: DSWD-Bicol
