WALAY naguba nga imprastraktura sa pagbaha sa pipila ka barangay sa GenSan.
Kini ang gibutyag ni Dr. Agripino Dacera, labaw sa City Disaster Risk Reduction Management Council kun CDRRMC gawas sa scouring nga nahitabo o pagka-anod sa shoulder sa sementadong kalsada apan gipaayo na usab kini sa mga personahe sa City Engineers Office.
Dugang ni Dacera, nga ang nagbarado nga mga basura sa drainage ang hinungdan sa pagbaha asa miawas sa dalan ang tubig nga mipalunop sa mga ubos nga lugar.
Hinuon walay nadaut nga balay gawas lang nga nahumod ang ilang pipila ka gamit ug may pipila ka mga residente nga gipabakwit labi na sa Barangay Lagao nga mokabat sa 23 ka pamilya, 60 ka pamilya sa Barangay Apopong, Barangay Labangal sa 60 ka pamilya ug pipila ka pamilya sa ubang flood prone barangay apan mibalik usab gilayun paghubas sa tubig.
Bugtong hangyo ni Dacera nga angayang dili labayan og mga basura ang mga drainage tungod kini ang mopabarado ug maoy hinungdan sa pagbaha ugaling adunay mga pag-ulan.
Nasayran nga nasinatian sa GenSan ang Inter Tropical Convergence Zone kun ITCZ hinungdan sa padayung pag-ulan nga miresulta sa pagbaha.
