Magatao ro Department of Social Welfare and Development (DSWD) Field Office VI it P3.8-M nga balor it Family Food Packs (FFPs) sa mga apektadong pamilya it flash-flood sa mga probinsya it Aklan, Antique, Capiz, ag Iloilo.
Ro flash-flood hay tuga it mabaskug nga pagbuhos it uean bangud sa shearline.
Naapektuhan it maeain nga paniempo ro mga banwa it Altavas ag Balete sa probinsya it Aklan; Culasi, Antique; Cuartero, Dao, Dumalag, Jamindan, Maayon, Mambusao, Panay, Panit-an, Pontevedra, Sigma, ag Tapaz sa Capiz; ag San Dionisio sa probinsya it Iloilo, kung siin nailista ro kabilugan nga 37,965 ka pamilya nga naapektuhan.
Bangud sa nasambit nga kalamidad, ro DSWD FO VI hay nagtao it relief augmentation pinaagi it 6,375 nga family food packs matapos ro unang pagresponde it mga Local Government Units. // ANN DESLENE SALAZAR
