LEGAZPI CITY – Ikinaoogma ngunyan kan Department of Trade and Industry (DTI) Bicol na nalampasan ninda an sales sa Orgulyo kan Bicol (OKB) Trade Fair ngunyan na taon kung ikukumpara sa nakalihis na taon.
Segun kay DTI Bicol Regional Information Officer Bhem Berango, labi PHP25M an nakua nindang sales sa presenteng taon kan OKB.
Halangkaw ini kun ikukumpara kan nakaaging taon na uminabot sana sa PHP18M.
Paliwanag ni Berango, huli ini kan pagpapaheling ki manlaen-laen asin bagong produkto o product development asin innovation.
Nauyunan su boot an mga ini kan mga parabakal sa Metro Manila.
Dakula an naging improvement kan mga food asin non-food items orog na sa packaging na nagin rason tanganing maenganyar an mga parabakal na magbakal kan produkto.
Segun pa kay Berango, mas madakol pa an demand kan mga produkto nin huli ta dakol an institutional buyers.
