Ipinag-utos na ni Budget Secretary Amenah Pangandaman ang agarang pagre-release ng kabuuang P2.880 bilyon sa Department of the Interior and Local Government – Bureau of Fire Protection (DILG-BFP) upang suportahan ang patuloy nitong pagsisikap sa modernisasyon at palakasin ang mga kakayahan ng pamahalaan sa paglaban sa sunog.
Aprubado at pirmado ang Special Allotment Release Order (SARO) na naglalayong mai-transfer sa DILG-BFP ang naturang pondo para sa pagbili ng mga karagdagang firetrucks at emergency medical equipments.
Paliwanag ni Pangandaman, ang halagang P2.880 bilyon ay gagamitin para sa pagbili ng 154 firetruck, 3 collapsed structure at rescue truck, at 132 ambulansya.
Dagdag pa ng kalihim, ang naturang halagang ay kukunin mula sa balanse ng 80% na bahagi ng BFP mula sa mga kinita ng ahensya ayon sa Republic Act (RA) No. 9514 o ang Fire Code of the Philippines.
