Mukabat sa P2.5 Million ang gitanyag nga reward money alang ngadto sa makatudlo kung si kinsa ang mipusil-patay sa Sk Federation President sa Maco Davao de Oro nga si Hon. Jorlan Bon Sacay.
Sa gipahigayon nga Press Conference kagahapon, Huly 19, 2023, gibutyag ni Davao de Oro Governor Dorothy Montejo-Gonzaga nga kagahapon pa lamang sa buntag miabot na sa P2M ang nalikom nga reward money gikan sa mga higala sa biktima ug sa Provincial Government sa Davao de Oro ug Maco LGU.
Gipasalig sab sa Governor nga luwas gihapon ang Davao de Oro labi na sa mga politiko ug ilang gipaningkamotan nga isolated lamang kini nga kaso.
Samtang, duna na say gimugna nga Special Investigation Task Group kon SITG alang sa hinanaling kasulbaran sa maong krimen.
Una na nga gikondena sa Davao de Oro Police Provincial Office ang kamatayon sa Sk Federation President nga gipusil patay niadtong Hulyo 18 mismo gawas sa ilang balay.
Kahinumdoman nga gipusil-patay si Sacay sa riding in tandem sa dihang minaug na unta ang biktima gikan sa iyang sakyanan apan kalit na lamang siya nga gipusil makadaghang higayon alas-7:30 sa gabii sa Prk. Lasuerte Brgy. Binuangan, Maco, Davao de Oro.
