-Reymund Titong
KABANKALAN CITY, Negros Occidental — Matugnaw kag klaro ang panganud sang magluntad ang isa ka ‘head-on vehicular accident’ sa diin napatay ang isa ka soldado, sa crossing ambush, Barangay Manalad, banwa sang Ilog, pasado las-6 sang aga, adlaw sang Sabado, Hulyo 6.
Imboldado sa nasambit nga insidente ang isa ka ceres bus nga ginapaanag-iyahan sang Vallacar Transit sang pamilya Yanson kag isa ka Yamaha R3 nga motorsiklo.
Ginkilala ang biktima kay Private First Class John Leo Saldua, residente Purok Riverside, Barangay Napoles, sa syudad sang Bago, nga sa karun naka destino sa 15th Infantry Battalion sa banwa sang Cauayan. Samtang, ang driver naman sang ceres ang ginkilala naman kay Ryan Miraveles kag residente naman sang Barangay Dancalan, banwa sang Ilog.
Base sa inisyal nga imbestigasyon sang kapulisan, paagi sa mga panaysayon sang mga yara sa lugar, lakip na ang mga driver kag pasahero, padulong sa sur nga bahin sang probinsya ang direksyon sang motorsiklo sang gina-alegar gin-tingawaan sini nga mag overtake sa isa ka tricycle nga iya ginasundan, apang, wala niya natalupangdan ang nagapadulong nga ceres bus nga pakadto sa syudad sang Bacolod.
Apang, paagi sa bulig sang Closed-circuit television (CCTV) sang banwa, nakit-an nga madasig ang pag padalagan sang biktima sang motor nga yara sa outerlane antis nag lapaw ini sa center lane, kag didto na nga wala niya natalupangdan ang ceres bus nga padulong sa syudad sang Bacolod.
Wasak ang ulo sang biktima bangud sa pagkalampos sini sa rear windshield sang bus kag naka-agum sang tuman nga bali sa lawas kag pagka-utod sang tiil.
Gikan sa lugar kun sa diin una nga nagbugguay ang bus ang motor, gin-dalusdus pa sang bus ang motor sang halos 10 metros antis naka full-stop ang ceres bus. Wala naman may na-report nga napilasan sa mga pasahero sang bus.*
