Blangko pa ang otoridad kung unsay motibo ug kung si kinsa ang nagpaluyo sa pagpusil patay sa high profile nga magtiayon pasado alas kwatro sa kagahapon sa Phase 2 Solariega Subdivision Puan ning syudad.
Apan sumala kang Davao City Police Office Spokesperson PCpt. Rose Aguilar, gitoohang sniper ang nagpusil sa mga biktimang sila si Atty. Sitti Gilda Mahinay-Sapie ug bana niini nga kanhing Mayor sa Panamao Sulu nga si Muhaimen Mohammad Sapie sa gawas sa ilang balay sa maong exclusive subdivision.
Natigayon ang krimen pila ka oras human sa ilang programa sa usa ka radyo ug online nga nagahatag og legal advice.
Ilado ang abogada isip legal counsel sa mga dunay suliran sa yuta sa Davao City ug Davao del Norte.
Natigayon ang pagpatay sa mga biktima pila ka gutlo human sila migawas sa ilang opisina gawas sa ilang balay ug luyo sa hugot nga seguridad sa maong subdibisyon kung asa dili basta-basta makasulod ang dili homeowner.
