LEGAZPI CITY – Nagpapadagos pa hasta sa ngunyan an pigsasagibong operation plus timbang (OPT+) asin pagkua nin height sa mga kaakian sa kada munisipyo asin barangay sa Bicol Region.
Segun kay National Nutrition Council (NNC) Bicol Regional Director Arlene Reario, may mga munisipyo sa nasambit na rehiyon an nakapagsumiter na nin resulta kan saindang naitimbang na mga aki.
Titimbangon an mga aki o mga umboy puon 0-59 months old (below 5 years old) tanganing aramon an kamugtakan kan saindang nutrisyon.
Kaipuhan kaya nindang maaraman kun kulang sa nutrisyon tanganing matawan sinda nin interbensyon asin maiprayoridad pag-abot sa mga programa.
Pig-eenganyar kan opisina an mga magurang na may mga aki na laog sa nasambit na edad na makipagkooperar asin makipagtabangan sa sainda.
Darahon sana su boot sa barangay o sa Rural Health Unit nganing timbangon an saindang aki.
Piglalaoman man ni Reario na matatapos an OPT+ plus ngunyan na Enero sa kada munisipyo sa rehiyon nin huli ta kinakaipohan pa ining i-validate kan municipal action officers, nutrition dietician asin miyembro kan NNC nganing maaram kun tama an pagtitimbang asin pagsukol kan height.
