MIBANGON hinay-hinay ang operasyon sa shipping sa pantalan sa Makar, Barangay Labangal sa GenSan dungan sa pandemya. Sa rekord sa Philippine Port Authority (PPA) sa GenSan nakatala na og 1,700 million metric tons (MMT) volume sa cargo atong Hunyo.
Nakatunga na sumala pa kini sa usual annual average nga 3.4MMT, butyag ni Jay Daniel Santiago, General Manager sa PPA. Tandi atong 2020 nga nakagunit lang og 3.438 MMT ang pantalan o ubos sa 4% tandi sa wala pa ang pandemya nga naa sa 3.594MMT.
Matud ni Santiago, tungod sa gilaoman nilang port traffic sa pagbalik sa normal nga operasyon sa shipping sa mosunod nga mga tuig. Gitukod nila ang Port Operation Building (POB) complex ug giinagurahan Huwebes sa hapon sa pagpanguna ni Department of Transportation (DOTr) Secretary Arthur Tugade.
Naa sa POB ang buhatan sa Port Integrated Clearance Office nga one-stop-shop alang sa tanang transaksyon sa PPA sama sa Marine ug Terminal Services, Berthing, Public Assistance and Complaint ug uban pa. Dugang ni Santiago sa 46 katuig nga operasyon Port of Makar importante nga malambo ang mga pasilidad niini. Tungod kini ang gikonsidera nga ‘major gateway’ padulong ug gikan sa Mindanao dala ang mga produkto gikan sa Soccsksargen sama sa pinya, saging ug uban pa. ( Richel Gubalani)
